Allt milli himins og jarðar...

Snjór

2006-11-08T17:51:00.000Z

Það er ekki hægt að segja annað en að heimurinn lifni við þegar snjórinn birtist. Allt verður einhvernveginn kyrrlátara og bjartara, maður gengur inn í nýjan heim. Kertaljós og tónlist taka völdin og lærdómurinn afgreiddur í rólegheitum með notalega tilfinningu í hjartanu. Eitt og eitt jólalag laumar sér með, alveg óvart. Usssss......

Snjókorn falla....

2006-11-06T22:03:00.000Z

Fór á frááábæra leiksýningu leikfélags KSS á föstudags og laugardagskvöld. Oooh, það var svo gaman! Skemmtilegt leikrit, flottir dansar, glæsilegir búningar og já, bara stuð! Mæli með sýningunni. Annars var helginni eytt í að sofa og læra dálítið líka, verður það ekki að fylgja með?

Í kvöld fórum við Perla og Aron á fund fyrir þá sem ætla að taka þátt í verkefninu "Jól í skókassa". Það gengur út á það að raða saman litlum hlutum, leikföngum, ritföngum, sælgæti og hreinlætisvörum í skókassa sem síðan er pakkað inn í jólapappír og sent til Úkraínu til munaðarlausra barna og þeirra sem lítið eiga. Við ætlum sem sagt að hjálpa til við að fara yfir kassana, passa að ekkert fari með sem ekki má. Gaman að geta hjálpað aðeins til.

Þegar ég keyrði heim áðan mætti ég hellingi af snjókornum sem steyptu sér á móti bílnum. Nú er hvítt yfir öllu og ekki frá því að það sé smá jólafiðringur í maganum.
Hmm...Er málið að setja eitt jólalag í gangi? Neee, kannski ekki alveg. Sjáum til!

Fimmtudagur

2006-11-02T19:28:00.000Z

51 dagur til jóla og um það bil fjórar vikur eftir að skólanum. Milljón verkefni og próf í skólanum bjóða upp á stress og svoleiðis vanlíðan en ég er hress. Vetrarfríið lagðist vel í mig og ég naut þess að vera í fríi og njóta þess að vera til og þykja vænt um Hilmar minn. Við skruppum upp í Grænuhlíð sem ættin hans Hilmar á og vorum þar í einn sólarhring. Spiluðum og leystum krossgátur langt fram eftir nóttu og borðuðum slatta af nammi. Yndislegur tími!

"Svíarnir" mínir eru lentir á Íslandi. Mikið var gaman að hitta þau, öll orðin svo rosalega stór. Ágúst Örn frændi minn sem er 15 ára svo stór að mér líður eins og dverg ef að ég stend of nálægt honum. Hef ákveðið að standa alltaf svona 4 metrum frá honum og byrja að borða lyftiduft.

En já, núna er ég búin að skrifa smá fyrir Hilmar og Ólöfu sem er greinilega ekki búin að gleyma mér. Sjáumst!

Skólamót.

2006-10-04T12:31:00.000Z

Úúúú....spenningurinn magnast. Skólamót um næstu helgi og ekki hefur verið jafn mikil skráning í SJÖ ár! Það stefnir allt í að maður verði bara að sofa andfætis til að fá að koma með, og keyra á kassabíl uppeftir. Ég man svo ótrúlega vel eftir því þegar ég var að fara á fyrsta skólamótið mitt næstum akkúrat þremur árum. Mér fannst þetta spennandi, en ég kveið líka soldið fyrir. Þekkti ekki marga. En já, þetta verður stuð!
Alltaf yndislegt að koma upp í Vatnaskóg. Fallegur staður með ljúfar minningar.
En hjá, hér eru nokkrar myndir af síðasta haustskólamóti. :)

Það er eins og eitthvað vanti.

2006-09-28T23:20:00.000Z

Skyndilega fór birtan sem stafar af umferðarljósunum. Hvarf skipulega, hver hluti fyrir sig. Maður fann næstum því hvernig fólkið hélt niðrí sér andanum, hvernig spennan lá í loftinu. Maður lækkaði ósjálfrátt röddina, nú var hvísl viðeigandi. Sænskur maður stóð augndofa.
Í kvöld viku stjörnurnar fyrir skýjunum og stjörnufræðingurinn í útvarpinu talaði fyrir daufum eyrum. Samt sem áður var þetta spennandi. Eitthvað óþekkt. Þó var ekki mikill munur, en það vantaði samt eitthvað.

Dauðinn kvaddi dyra í blokkinni minni í vikunni. Nágranni síðan ég man eftir mér er nú horfinn héðan. Blessuð sé minning hans. Einu samskipti okkar voru kveðjur á ganginum þegar við mættumst, en samt er eins og eitthvað vanti.

Benjamín, Alda frænka, Jóhanna litla systir, Raggi.....til hamingju með að vera orðin árinu eldri.
Megið þið lifa vel og lengi.

8000 brjálaðar býflugur!

2006-09-18T00:25:00.000Z

Hljóp tvo kílómetra í dag. Hilmar dró mig með sér.
Fannst þetta mjög gaman og ætla aftur á morgun. Kannski að þetta sé eitthvað fyrir mig. Jafnvel þó að rigningin blandaðist svitanum á enninu og vindurinn gerði lúmska tilraun til að hægja á ferð okkar gekk þetta eins og í sögu. Eftir að hafa þraukað tvo kílómetra og komist að Árbæjarlaug aftur þar sem við hófum för okkar var ég himinlifandi og stolt af sjálfri mér.
Ekki varð ég minna ánægðari þegar við höfðum lokið við að skipta um dekk á bílnum, en við tókum eftir því þegar við komum að Árbæjarlaug eftir hlaupin.

Hef ákveðið að fara að safna Barnabiblíum á sem flestum tungumálum. Finnst það áhugavert og eitthvað sem skemmtilegt gæti verið að eiga. Maður er líka stundum með hugleiðingar fyrir börn í sumarbúðunum, leikjanámskeiðunum og annarsstaðar þannig að þetta gæti nýst manni þar líka.

Litli bróðir minn vaknaði upp með hrikalegum öskrum áðan. Ég var í heimasímanum að spjalla við Perlu og brá auðvitað ekkert smá. Fór fram til hans og spjallaði við hann en hann reyndi að telja mér trú um að það væri 8000 brjálaðar býflugur inn í herberginu hans. Eftir smá stund sættumst við á það að þetta hefði bara verið brjálaður draumur og það væri mjög óþægilegt að dreyma svona.
Kannski að draumurinn stafi af því að hann var að taka til í herberginu sínu í gær og sá eina silfurskottu á gólfinu. Það var reyndar eitrað fyrir þeim í allri blokkinni í sumar, en þessi hefur kannski verið svona rosalega lífsseig. En ekki get ég útskýrt afhverju hann var svo viss um að þær væru 8000.......

Langar að skella þessari inn, svona í tilefni þess að ég er næstum búin með Sjálfstætt fólk eftir Halldór K. Laxness og er á leiðinni á Gljúfrastein með skólanum. Þessi bíll er sem sagt bíll Halldórs sem stendur fyrir utan Gljúfrastein í Mosfellsdalnum.

Smááá.....

2006-09-15T16:10:00.000Z

Þegar stóra frænka í Svíþjóð er farin að minnast á það að maður sé búið að vantækja bloggið soldið hlýt ég að vera farin að vanrækja þetta soldið. Það er nú bara þannig að ég nota tölvuna ekki mikið þessa dagana nema til að skrifa ritgerðir og gera verkefni. En jæja...

Sá sem að sagði að það borgaði sig ekki að kvarta hafði nú barasta rangt fyrir sér.
Við Perla erum saman í náttúrufræði og erum með yndislegan kennara. Hann er algjört krútt og hann lifir sig svo inn í kennsluna að ég hef aldrei séð annað eins. Lætur stundum eins og hann hafi jafnmikla óbeit á námsefninu eins og sumir í tímanum, og lætur okkur alveg heyra hvað sé leiðinlegt í þessu fagi. Allavega.... Við Perla eigum það til að spjalla við hann og hann kemur jafnvel oft til okkar eftir tímann og ræðir við okkur um eitthvað sem brennur á honum eða okkur.

Í gær gerðum við athugasemd við hann, en okkur fannst frekar leiðinlegt að hann hefði blótað fjórum sinnum í tímanum, þetta væri nú ekki hægt fyrir framan fulla stofu af krökkum, ekki alveg nógu góð fyrirmynd. Hann tók bara vel í þetta, og þegar við mættum í dag var hann búinn að setja upp blað í Exel; talsmáti kennara, plúsar, mínusar og athugasemdir. Einnig var hann búinn að merkja samviskulega við dagsetninguna í gær og þessa fjóra "mínusa" sem hann fékk þá. Nú áttum við að fylgjast með honum í tímanum og taka út talsmáta hans. Eftir tímann töldum við hann hafa fengið þrjá plúsa og endaði hann þá með einn í mínus.
Já, flest er nú til!

Mánudagur 21.ágúst -Dagur hinnar miklu biðar.

2006-08-21T21:03:00.000Z

Já, í dag beið ég. Beið eftir að það væri tímabært að leggja af stað á skólasetninguna, beið í meira en eina og hálfa klukkustund eftir að fá að tala við áfangastjóra, beið í Glitni með Hilmari, beið í Tryggingastofnun, beið eftir að fá að tala við námsráðgjafann.......osfv. Úff!

Fyrir þá sem ekki vita stefni ég að útskrift í vor og klára þá félagsfræðibraut Flensborgarskóla á þremur árum. Mér finnst gaman að hafa nóg að gera og eins og Biggi vinur minn segir þá er kannksi bara gott að hætta á toppnum, þegar það er skemmtilegast í skólanum. Geta litið um öxl og rifjað upp góðar minningar. ( Hann kláraði einmitt Versló á 3 árum)
En já, til þess að þetta gangi nú allt upp verður taflan mín að vera full=21 eining.
En neeeei, ég er með 16 einingar! Glæsilegt! Tjaaaa...

Ég reyndi að ræða málin við Torfa áfangastjóra eftir að hafa beðið mjööög lengi í röð. Við komumst að þeirri niðurstöðu að ég þyrfti bara að skrá mig í fjarnám í Flensborg eða öðrum skólnum. Þessari töflu varð sko ekki haggað. Hann taldi upp hina ýmsu áfanga sem að pössuðu í eyðurnar mínar, en úpps...ég er bara búin með það mikið að ekkert passaði! Bömmer.....
Taflan mín er svo sem fín, og ég ætla bara að redda þessu með fjarnámi...
Líkar líka vel við áfangana sem ég fékk; ÍSL 503, ENS 503, NÁT 123, FÉL 313 ( félagsfræði þróunarlandanna), og SAG383 ( Grikkir og rómverjar)
Sé hvítu stúdentshúfuna í hyllingum.......
---

Mér finnst ótrúlega leiðinlegt að sjá fólk sem stendur bara eitt og er ósköp einmanalegt að sjá.
Í byrjun skólaársins er þetta algengt í skólanum.
Ég ætla að reyna mitt besta til að heilsa nokkrum svona krökkum. Maður getur ekki bjargað öllum heiminum, en bros og spjall getur dimmu í dagsljós breytt.
Situr einhver einn í matsalnum, eða er manneskjan sem situr við hliðiná þér í tíma ný?
Um að gera að heilsa, kynna sig og vera viðkunnalegur.

Sunnudagur 20.ágúst

2006-08-20T18:27:00.000Z

Jáááh, ég veit....Gleymdi mér!
Veit að það er kannski engin afsökun en síðustu tvær vikur hafa bara verið klikkaðar og ég datt niður dauð um ellefuleytið öll kvöld. Svo hefur netið ekki verið í sínu besta formi undanfarið þannig að það voru alls ekki kjöraðstæður fyrir blogg hérna Láruherbergi í Hafnarfirði.

En já, skólinn er að byrja á morgun....og mér lýst veeeel á það! Hlakka til að sökkva mér niður í bækurnar og reyna að gera mitt allra besta. Verð með 25 einingar, sem sagt fulla töflu ( 3*7+leikfimi) og fjarnám frá Versló sem verður líklega lögfræði eða efnafræði 103. Nóg að gera, en það er bara gaman. Hlakka líka til að hitta þá sem ég hef ekki séð mikið í sumar, og svo er Perlan mín yndislega að koma í Flensborg. Svo ekki séð talað um að ég var bara hreinlega komin með nett ógeð af börnum þannig að ég tek skólanum fagnandi. Veiii!
Ég verð nú samt að viðurkenna að ég hefði alveg viljað eiga sum börnin þarna á leikjanámskeiðinu og svo á ég líka eftir að sakna soldið að vinna með samstarfsmönnum mínum. Sérstaklega Birgi og Aroni sem gerðu ágústmánuð þolanlegan. Takk strákar! ;)

En já, hér koma nokkrar myndir af menningarnótt, ætla ekki að hafa þetta lengra í bili.
Ólöf, þú ert æði! Haaaaaaalldór!!!

Smá endurvakning!

2006-07-25T01:02:00.000Z

Já, er ekki bara kominn tími til að hressa aðeins uppá þessa síðu? Hún er búin að vera alltof mikið í sumarfríi. Eða hvað?
Ætli hún sé ekki bara alveg gleymd og grafin hjá þeim örfáu sálum sem hættu sér stundum hingað? Síðasta færsla var skrifuð þegar það var vika í að ég héldi uppí Vindáshlíð, en núna eru um 10 dagar í Verslunarmannahelgina. Sumarið líður bara svo hratt....

Vikurnar mínar fjórar í Vindáshlíð einkenndust einkenndust af söng, hlátri, rigningu, fjöri, þreytu, gítarspili, mat, brennó, vinaböndum, yndislegu samstarfsfólki, einstaka sólbaðsdögum uppá þaki,.......og algjörlega nýrri upplifun á þjóðsöng okkar Íslendinga. Fjögur bænaherbergi, Grenihlíð, Gljúfrahlíð, Furuhlíð og Hamrahlíð. Allar gerðir af stelpum, fjörugar, ljúfar, óþægar, krúttlegar, indælar....

Bænastelpurnar mínar í Furuhlíð, 1.flokkur.

Tilbúnar í næturleik; 3.flokkur/Ævintýraflokkur.
(Frá vinstri: Gulla, Perla, Anna, Lára.)

Að gera mig tilbúna fyrir fánahyllingu í 2.flokki.

Eftir foringjabrennóleik í 3.flokki. Hörkuleikur við Skógarhlíð.

Síðan ég kom heim hef ég verið að vinna á leikjanámskeiðum KFUM&K með 5 daga fríi í millitíðinni. Þetta er mjög fínt, margir skemmtilegir samstarfsmenn.
Skelltum okkur svo nokkrir vinir í útilegu á Laugarvatn eina helgina og skemmtum okkur bara vel. Komst reyndar að því að trampolín notkun getur verið vafasöm. Síðan er það bara Vatnaskógur um Verslunarmannahelgina. En já, ég ætla að vera dugleg að skrifa hérna inná.....lofa! ;)

Tæp vika í Vindáshlíðina..

2006-05-30T15:17:00.000Z

Tæp vika í Vindáshlíð. Ég hlakka mikið til, þó að það sé smá kvíði í maganum. Kannski afþví að ég hef aldrei verið svona lengi að heiman í einu, en ég verð í fjórar vikur. Líka soldið leiðinlegt að sjá Hilmar svona lítið í tvær vikur, en ég trúi líka að það sé þroskandi. En ég held að þetta lagist allt þegar maður er búinn að koma sér fyrir og svona, og komin inn í rútínuna.
Við Perla herbergisfélagar í fjórar vikur......= gaman!

Er búin að bralla ýmislegt síðan skólinn kláraðist. Sund, tiltekt hérna heima, video-gláp,......
Í gær fórum við Perla, Aron og Gulla í sund, redduðum nokkrum hlutun, borðuðum á Pítunni, kíktum í Nauthólsvík og prófuðum að vaða smá í sjónum, og skemmtum okkur á rúntinum niður Laugarveginn. MJÖG skemmtilegur dagur.

Tapsáru Grikkir!

2006-05-21T00:16:00.000Z

Ég held að Grikkir eigi annað hvort við mikinn skort á húmorsleysi að stríða, eða að þeir séu afskaplega tapsárir. Ég meina það, það er sárt að láta púa á landið sitt.
Maður getur nú svo sem skilið að einhverjir þarna úti hafi verið pirraðir á Silvíu, en að púa á Ísland þegar hún varð að tilkynna stigin frá okkur hérna á klakanum, er aaaaðeins of!
Mér fannst samt æði að Finnland hafi unnið. Þeir voru snillingar. Frábært þegar land sem alltaf hefur gengið illa með sín rólegu og fáguðu lög, tefli fram skrímslum í latexbúningum og vinni með stæl!

Í dag kíkti ég á Lan´ið sem nokkrir strákar í KSS voru með. Eyddi síðan kvöldinu í góðra vina hópi í stúdentsveislu hjá Jóhönnu Maríu. Mikið rosalega hlakka ég til að setja upp hvítu húfuna eftir ár......Vona bara innilega að allt eigi eftir að ganga vel.

Við Perla, Tinna og Aron fórum á rúntinn um daginn og máluðum Smáralindina rauða.
Tókum líka nokkrar myndir.

Bæjarstjóri að slökkva sinueld?

2006-05-17T23:51:00.000Z

Einhver brjáluð tónlist er búin að óma á fullu í gegnum þunna trévegginn milli herbergjanna okkar elstu systkinana síðasliðinn klukkutímann. Úff, ég þoli hana bara ekki.
Stundum, þegar eitthvað er búið að fara lengi í taugarnar á mér, ákveð ég að mæta því með jákvæðu hugarfari og breyta því í góðar tilfinningar og láta mér líka vel við það.
Og vitið þið hvað, tónlistin hans ætlar bara ekki að venjast.

En já, önnin formlega búin. Einkunnirnar komu vel út. Náði öllu og á 48 einkunnir eftir af 140.
Klára eftir ár, og langar að taka einn eða tvo áfanga í sumarskóla. Farin að sakna skólans....*roðn*.
Spjallaði aðeins við bæjarstjóra Hafnarfjarðar í dag, annan daginn í röð.
Í gær hringdi ég í neyðarlínuna vegna sinubruna fyrir aftan bílskúrana okkar, og slökkviliðið, sjúkrabíllinn og BÆJARSTJÓRINN mættu á svæðið.
Og í dag var hann ásamt fleirum samfylkingarmönnum fyrir utan skólann. Ég sagði honum að ég mætti ekki kjósa, en hann vildi nú endilega gefa mér rauðan bolta afþví að ég var í bol merktum "Vatnaskógur 2006". Hafði verið í Vatnaskógi þegar hann var lítill.

Þriðjudagur

2006-05-16T18:44:00.000Z

Ekki virðast margir hafa uppgötvað þessa síðu hér, ef marka má athugasemdaleysið hér á síðunni.
Ég held samt ótrauð áfram, finnst svo gaman að skrifa.

Dagurinn fór bara rólega af stað. Las bók fram til hádegis, og flakkaði um á netinu.
Notalegt að vera í fríi. Aaaaah! Kíkti svo í Smáralindina með aðalsvísunum í Setberginu, Perlu-Tinnu og Guðnýu.
Þess má geta að þær hafa allar nýlega heimsótt hárgreiðslustofu og eru rosa sætar og fínar.
Eftir það var farið að smá tiltekt hérna heima með fjölskyldunni, og hjá litlu hömstrunum mínum.
Á morgun ætla ég svo að skunda niður í skóla og ná í einkunnirnar mínar. Er dáldið spennt fyrir íslenskunni, en hef voða lítið hugsað um hin fögin. Býst ekki við neinu falli, og á þá 48 einingar eftir uppí stúdentspróf..

Mikið afskaplega getur það farið í taugarnar á mér þegar fólk segir eitthvað í hugsunarleysi á netinu og pælir ekkert í því að fólk, með tilfinningar, geti líka skoðað skrifin. Oooh....
Maður verður svo mikið að passa sig, og örugglega ekki saklaus sjálfur.
Aðgát skal höfð í nærveru sálar, reynum að muna það.

Sjáumst!

Notalegur staður.

2006-05-16T01:00:00.000Z

Mér lýst bara gífurlega vel á þennan stað. Kannski eru það bara myndirnar sem að heilla, veit ekki.En alltaf gaman að breyta til.

Var uppí Vatnaskógi um helgina. Skemmti mér mjög vel sem foringi með Arnari og Þór Bínó.
Alltaf yndislegt að vera í Vatnaskógi. Verð alltaf svo "tímalaus" þegar ég er stödd í sumarbúðum. Man ekkert hvaða dagur, eða hvaða mánuður. Maður er bara að bralla eitthvað, og líður vel.
Held að stelpurnar í feðginaflokknum hafi skemmt sér bara mjög vel.
Bara frekar róleg helgi, samt alltaf nóg að gera.
Fór svo heim í flottum Vatnaskógarbol. Bolirnir í sumar er sko æði!

En já, eyddi deginum í dag bara í að slappa af, þar sem ég er ekkert að vinna þangað til að ég fer í Vindáshlíð. Skruppum svo nokkur í Árbæjarlaugina í kvöld.

Nýr staður...

2006-05-16T00:35:00.000Z

Er búin að ákveða að skipta um blogg. Héðan í frá ætla ég að búa hér.
Hér get ég sett inn myndir og mér finnst þetta líka eitthvað svo miklu notalegra.
En já, ætlaði bara svona rétt að prófa þetta. Athuga hvernig þetta kemur út og svona.